DBH

Bestetik, solasaldi dialogikoak burutu ohi dituzte ikasleek. Modu honetara, ikaskideekin elkarbizitzen ikasten dute, norberaren iritziak eta hausnarketa pertsonalak plazaratuz, gainontzekoenak entzunez, eztabaidatuz, iritzia zuzenduz… Horrelako lanketekin ikasle aktibobilakatzen dira, hausnarketak egiten dituzte, emozioak azaltzen ikasten dute… Askotan, kalean egiten ditugu solasaldiak, herria bera ikaskuntza-espazio gisa baliatuz.

Proiektu hauetan, ikasleek eduki jakin batzuk lantzen dituzte, ondoren horiek aplikatuz gizarteari zerbitzu bat emateko. Gainera, diziplinarteko proiektuak dira. Horrelako proiektuetan zein egunerokoan ikaskuntza kooperatiboa dugu oinarri. Talde-lanean aritu ohi dira gehienetan. Horrelako lanen bidez, euren artean edukiak azaltzeaz gain, elkarlanean aritzen ikasiko dute. Eta gainontzekoekin elkarlanean aritu ahal izateko, ezinbestekoa da norberak bere emozioak kudeatzen jakitea; honek lehenago aipatutakora eramaten gaitu zuzenean, autoezagutzara, hain zuzen. Norberak bere burua ongi ezagutzeak gainontzekoekin duen harremana ongi kudeatzen laguntzen du.

Aurreko etapetan landutakoari jarraipena emanez, emozioei eta adimen emozionalari garrantzi handia ematen diogu. Izan ere, ikasleen ongizate emozionala gakoa da edozein ikaskuntza burutu ahal izateko. 

Ikasleen garapen emozionalari zenbait ordu eskaintzen dizkiogu astean. Alde batetik, ohiko tutoretza saioak burutzen ditu tutoreak bere ikasle-taldearekin. Honetan, bereziki ikasleen autoezagutza lantzen dugu, norberak bere burua ezagutzea lortzeko. Kontuan izan behar da etapa honetan zehar euren identitatea eraikitzen joango direla, eta guretzat garrantzitsua da ikastolan garapen horri espazioa eskaintzea. 

Era berean, ikasleen irteera profilari eutsiz, norberaren interes profesionalei eta etorkizuneko proiektuei buruzko hausnarketak sustatzen ditugu, pixkanaka euren ibilbidea izan daitekeenaren eskema mentala osatzen joan daitezen. Gainera, badakigu adin honetan taldeak indarra hartzen duela: ikasleak ohartzen dira arazo berdinak dituztela, eta elkarren artean identifikatuak eta ulertuak sentitzen dira. Egoera honetan, garrantzia ematen diogu norberaren autonomia garatzeari, taldearen indarrak modu indibidualean dituzten ardurak eta erantzukizunak ezkutatu ez ditzan. Honekin loturik, bizikidetzari ere espazioa eskaintzen zaio tutoretza saioetan. Ikasleek dituzten eskubideak eta betebeharrak lantzen dira, ikastolaren funtzionamendu egokia ahalbidetzen duten arauen inguruan hausnartuz eta hauek onartuz. 

LHko jarraipena eginez diziplina arteko izaera duen proiektuak dira DBHko etapan EKI proiektua oinarri. Proiektu honek giltzarri ditu euskara, euskal kultura eta ikasleen gertuko testuingurua eta, honen bidez, ikasleek gaitasunak garatzea da helburua.

Lau urteko etapa bada ere, hasiera-hasieratik ikasleen irteera perfilak zein izan daitezkeen badakigu. Horrexegatik, etaparen hasieratik ikasleekin orientazioa lantzen dugu, DBHko ibilbide osoan zehar arreta zuzena jartzen dugu honetan. 

Ongi ezagutzen dugu, esate baterako, Oinarrizko Lanbide Heziketaren aukera. Horrez gain, bereziki bigarren zikloan (3. eta 4. mailetan) tutoretza-saioetan ikasleek graduatua eskuratu ostean dituzten aukerak lantzen dira:

• Batxilergoa eta Lanbide Heziketa, eta horiek garatzeko inguruko zentroetan dagoen eskaintza akademikoa
• Goi-mailako ikasketak egin ahal izateko aukeran dituzten prestakuntza-ibilbideak, bai unibertsitatean, bai goi-mailako zikloetan

 Hezkuntza eskaintza aztertu ondoren, ikaslearekin batera dituen aukeren inguruko hausnarketa egiten dugu, erabakia hartzen laguntzeko. Horretarako, ikaslearen autoezagutzan jartzen dugu fokua: zein helburu/asmo dituen, zein lanbide duen gustuko, zein interes profesional dituen, zeintzuk diren bere gaitasunak eta indarguneak… Ondoren, ikasketa aukerak baloratzen ditugu, ikasketa-eskaintza osoa aztertuz. Prozesu honen bukaeran, tutorea ikaslearekin eta gurasoekin bilduko da, testen emaitzak eta orientazio aholkua emateko, eta baita aurrematrikulak eta matrikulak egiteko prozedurak azaltzeko ere. 

DBH ondorengo ibilbide-eskaintza zabala dagoenez, etapa honetan zehar ikasleen konpetentzien garapenean jartzen dugu arreta, etaparen amaieran hautatuko duten ibilbide horretarako prest egon daitezen.